सलमानका कारण ‘बीग बोस’ प्रतिस्पर्धी असुरक्षित ?

बलिउड नायक सलमान खानको धम्कीका कारण आफू असुरक्षित भएको भन्दै रियालिटी टीभी शो ‘बीग बोस’मा सहभागी एक प्रतिस्पर्धीले प्रहरीमा उजुरी दिएका छन् ।
एक सातामै यो शोबाट बाहिरिएका जुबेर खानले सलमानको धम्कीका कारण आफू असुरक्षित भएको भन्दै प्रहरीमा एफआइआर दर्ता गरेका हुन् । जुबेरले शोमा सहभागी भएको दिनदेखि नै अन्य प्रतिस्पर्धीसँग अभद्र व्यवहार गरेको, महिला सहभागीसँग असभ्य भाषा बोलेपछि शोका संचालक सलमान खान उनीविरुद्ध खनिएका थिए । उनले, शनिबार प्रशारित शोमा जुबेरलाइ निकै थर्काएका थिए । सलमानकै कारण जुबेर शोबाट बाहिरिएका हुन् ।
शोबाट बाहिरिए लगतै जुबेरले सलमानसँग बदला लिने सोचेका छन् । उनले दर्ता गरेको एफआइआरमा लेखिएको छ-‘मलाइ सलमानले कुकुर बनाउँछु भनेका छन् । बाहिर निस्किएपछि आफूलाइ नछोड्ने भन्दै धम्की पनि दिएका छन् । साथै, बलिउडमा काम नै गर्न नदिने धम्की समेत दिएका छन् ।’
जुबेरले सलमानका कारण आफ्नो ज्यानको सुरक्षा नभएको भन्दै प्रहरी गुहारेका हुन् । अब, प्रहरीले सलमानविरुद्ध कस्तो एक्सन लिने हो, हेर्न बाँकी छ ।
२०७४ असोज २३ गते १२:१५ मा प्रकाशित