खाएको थाल आफैं माझ्छुः माग्ने बुढा

मेरै बास्सै’बाट चर्चामा आएका केदार घिमिरे अहिले फिचर फिल्ममा व्यस्त छन् । हास्य कलाकारको सूचीमा समेत फरक पहिचान बनाउन सफल उनी ‘माग्ने बुढा’का रुपमा प्रख्यात छन् । तिनै माग्ने बुढासँग अनलाइनखबरले गरेको कुराकानीः
पछिल्लो पटक खुशी भएको क्षण ?
पेटको रोग लागेपछि एक किसिमको डिप्रेसनमा थिएँ । सिनेमा हलमा छक्कापञ्जा चल्दै थियो । दीपक दाइ र दीपा दिदीले मलाई हलमा लिएर जानुभयो । सबै दर्शकले ‘माग्ने माग्ने’ भनेर बोलाउँदा असाध्यै खुशी लागेको थियो ।
दुःखीचाहिँ केले बनाउँछ ?
दुःखी बनाउने तत्व धेरै छन् । मुख्य त, सिस्टम नै हो । अस्तव्यस्त सडक, कोचाकोच र जाममा परेका सवारी अनि अचाक्लि महंगीलगायत धेरै कुराले टेन्सन गराउँछ ।
‘माग्ने’ भनेर बोलाउँदा रिस उठ्दैन ?
केको रिस उठ्नु, बडो रमाइलो लाग्छ । कहिलेकाहीं बाटोमा हिँड्दा पनि साना केटाकेटीहरु ‘ऊ माग्ने बुढा’ भन्छन् । सुन्दा खुशी लाग्छ ।
माग्ने नाम कसरी जुर्‍यो ?
मोहन मिश्र दाइको ‘आम्मै’ भन्ने सिरियल थियो । मैले तीन भागको स्त्रिmप्ट लेखेर दिएको थिएँ । उहाँलाई मन परेन कि क्या हो बनाउनु भएन । अनि मैले पछि आफैंले बनाएँ ‘माग्ने बुढा’को क्यारेक्टर राखेर ।
रियल माग्नेसँग भेट भएको छ ?
संगतै गरेको त छैन । तर, बेला-बेलामा घरमा आउँछन् । मन्दिरतिर जाँदा पनि भेट्छु र सामान्य सहयोग पनि गर्छु ।

दिनमा कति जनासँग फोनमा कुराकानी हुन्छ ?
बिरामी हुँदा त कसैको पनि फोन उठाइनँ । अहिले त बाक्लै कुराकानी हुन्छ । दैनिक ५० जना जतिसँग कुरा हुन्छ होला ।
तपाईंबाट सिक्नुपर्ने कुरो ?
खासै छैन । म एउटा सामान्य मान्छे हुँ ।
खराब कुरो ?
एक दुइटा छ, त्योचाहिँ नभनौं कि ?
झुट कत्तिको बोल्नुहुन्छ ?
ठीकै । कहिलेकाहीं मिलाएर झुट बोल्नुपर्ने हुन्छ । मैले झुठो बोलिदिँदा कसैलाई हानी हुन्न या कसैलाई फाइदै हुन्छ भने झुठो बोलिदिन्छु ।
झगडा गरेको याद छ ?
बुझ्ने भएपछि चाहीं छैन । सानोमा दाइसँग खुब झगडा पथ्र्यो । तर, जित मेरै हुन्थ्यो । दाइले जित्यो भने बाले दाइलाई बजाइहाल्नुहुन्थ्यो ।
घरको काम कत्तिको गरिन्छ ?
आफूले भात खाएको थाल आफैं माझ्छु । उठेपछि आफू सुतेको ओछ्यान आफैं मिलाउँछु । मैले घरमा गर्ने महान काम यही नै हो ।
भात पकाउनु भएको छ ?
मलाई सबैथोक बनाउन आउँछ । कहिलेकाहीं पकाएको छु ।
छोराछोरी के बनिदिए हुन्थ्योजस्तो लाग्छ ?
कलाकारै बनिदिए हुन्थ्यो भन्ने लाग्छ तर छोरी आईटी पढ्छु भन्दैछिन् ।
इन्टरनेटमा कति घण्टा बिताउनुहुन्छ ?
दैनिक चार घण्टा ।
पहिलो पटक मेल एकाउन्ट खोलेको याद छ ?
ठ्याक्कै याद छैन । हटमेलको जमाना थियो । मलाई मेल खोल्न आउँदैनथ्यो । साइबरकै मान्छेलाई भनेर हटमेल खोलेको थिएँ । अनि, हङकङमा रहेका एक साथीलाई मेल पठाएको थिएँ ।
काठमाडौंको राम्रो कुरो ?
काठमाडौंमा मुलुकका विभिन्न स्थानबाट आएका मानिसको बसोबास छ । विभिन्न जातजातिका मान्छे पनि छिमेकी भएर बसेका छन् । संसारमा यस्तो मिलन थोरै ठाउँमा मात्रै हुन्छ । कति देशमा त जातकै कारण युद्धसमेत भएको छ । यस अर्थमा काठमाडौंका मान्छे महान छन् ।
२०७४ असोज २३ गते १६:१० मा प्रकाशित